“Takaji habar”, “takaji ilmu dadangaran”, “basa laut”-nya sama
haja: “termakan isu”. Pandiran urang, habar di surat kabar, radiu, tipi
wan internet ditaguk bulat-bulat, padahal balum tantu bujur. Saku ada
jua nang bapihak, adu-asah, mawaluhi, mahabui urang haja.
Takisah, Utuh Tipang wan Aluh Kaciput. Rahat bahandip gasan kawinan anak
Utuh Supir, urang kampung takumpulan. Di higa rumah Utuh Supir, di
bawah rapun hambawang, bibinian maricih rarampah, lalakian maulah wadah
gasan mangawah.
“Dimapa urang nang bahual di gardu tadi,
Abahnya?” Aluh Kaciput manakuni lakinya Utuh Tipang nang maulah
pangawahan. “Sudah baakuran, balum?”
“Sudah!” jar Pambakal Utuh
Jagau nang manggiling timbaku. “Urang Hulu wan urang Hilir! Kusuruh inya
bamaapan! Ujarku, mun kada bamaapan, kulapau badudua!”
“Hau...?” jar Aluh Kajang nang maricih bawang habang. “Tadi Utuh Kabuau ada jua bapadah. Dimapa kisahnya?”
“Mahual kajadian di Jakarta, nang tanggal ampat samalam!” jar Utuh
Tipang. “Saikung malawanakan nang unjuk rasa, saikungnya kada. Saikung
handak umpat sumbahyang Jumahat di tangah kartak, di Jakarta, tanggal
dua, bulan kaina. Kaduanya bakancangan. Parak batamparan!”
“Hau?
Baapa manggaduhi nang di Jakarta? Jaka manggaduhi warga banua nang
rumahnya taburahai ditampur angin tutus, nang rumah wan pahumaannya
ba’ah! Imbah pang, dimapa?” jar Utuh Supir nang mambawa banyu satrup wan
pupuluran.
“Kukiau Pambakal Utuh Jagau!” jar Utuh Tipang.
“Cah...! Baik kita basalamatan, bayasinan, maarak Kitap Bukhari-Muslim.
Arba Mustamir! Supaya bala kada turun di banua! Piragah panahunya.
Sakulah tinggi pada rapun nyiur, hakun umpat kambing tumbur. Takaji
habar, takaji ilmu dadangaran...” (ysas)
(“Pandiran Banua”, TVRI Kalimantan Selatan, Banjarmasin. Siaran Saptu, 26.11.2016, Pukul 17.00 WITA.)
live on streaming www.tvrikalsel.tv/streaming
Sumber:
https://www.facebook.com/y.s.agus.suseno/posts/1120103594775816
Posting Komentar